Boerebroeligtraditie op vastelaovesdeesdig
De Boerebroelig

De Boerebroelig


Ein prachtige tradisie die noot verlaore moog gaon: De Posterse Boerebroelig. Ein broelig wie gein anger. Vier griepe truuk nao vreuger jaore, wie de belangriekste beroepsgroep nag oet boere, knechte en landjwirkers besjtòng. Gein wonjer det jidderein zich de beste Boerebroeligkleijer aanduit, patsj of hood opzit en fees viert in ein setting van ein goow hongerd jaor geleeje. Zelfs de foto’s waere veurnamelik in zwart-wit gemak.

‘t Gebroek wilt det de Broed en Broedegom oet ‘t Posterse verenigingslaeve waere gekaoze. En wie bekind, aan vereniginge gein gebrek in òs dörp. Wo in eerder jaore ‘t Boerebroedspaar tiedes de Bontje Aovend waerde veurgesjteld aan ‘t dörp, höbbe zie noe häöre eige feesaovend in ‘t veursezoen. Hie waert bekind gemak waem Broed, Broedegom, tuug en femielje zeen.

De echte Broelig vingk jidder jaor plaats op Vastelaovesdeesdig. Taege ‘t inj vanne middig komme de Biemösje, Dorsjvlaegels, leeje van ’t ABC, zaate hermenie(je) en alle anger geïnteresseerde same inne kefee. Onger leiding vanne Ceremoniemeister en muzikale invulling vanne zaate hermenie van deens trèkke vier noa ‘t volgende kefee wo vier de Broedegom aafhoale.

Vervolges haole vier same met de Broedegom zien Broed aaf en trèkke in optoch nao de feeslokatie, wo t Boerebroedspaar in de onech verbonje waert door de Ambteneer vanne Burgerlikke Standj.

Aansjloetend is d’r gelaegenheid om ‘t Boerebroedspaar te felicitere en kin ‘t fees beginne. Zo wie zich det huurt op ein broelig, numme de gaste gesjinke met veur de pasgetrouwde. Naeve de prachtige kedoos en aandinkes, waere d’r jidder jaor kilo’s kees, worsj, eier en anger aeteswaar gesjònke aan ‘t broedspaar. Dees aeteswaar waert ter plekke klaorgemak, gesneeje en op grote sjaole oetgedeild aan de aanwezige. Zo haet jidderein naeve ein lekker glaeske fris, beer of wien auch get lekkers te aete deze aovend.

nao baove

Boere broedspaar


Gaer sjtelle vier uch ‘t Boerebroedspaar van sezoen 2018-2019 veur:

Conny
van Wiel van Driek de zoere van Koob van boere Piete Leen en Fien van Sjaak de bekker van Sjaelberg en van Truus van Frans van mooder oet de koel en Neel van Fritske van de köster.

&

Enno
van Koos van Abraham van Overbeeke en Sija van Rijndorp oet Willemsjtad en van Lijni van Laurens van Nooteboom en Heiltje van van Roon uit Strien.

Conny is broed names Rondjom Kloosterhaof
Enno is broedegom names oppe fiets euver ‘t brögkse

Vier wunsje häör väöl gelök en ein prachtige broelig toe!

Wilt geer Boerebroed of –broedegom waere of kint geer eemes dae geer hie heel gesjik veur vingkj? Laot òs det dan estebleef weite via boerebroelig@biemosje.nl. Dan gaon vier gans discreet hie met aan de sjlaag.

nao baove

Funktionarisse


Ambteneer vanne Burgerlikke Standj
Al sinds jaor en daag waert de onechte huweliksvoltrekking oetgeveurd door òse onechte Ambteneer vanne Burgerlikke Standj: Ger Roncken. Ger zorg d’r jidder jaor weer veur det d’r naeve de algemeine gegaeves auch get gooi roddels euver ‘t broedspaar paraat haet. Zo neet, dan verzint d’r die d’r gaer bie. Ondanks de sjaele zeiver zorg d’r jidder jaor veur ein plechtige aangelaegenheid tiedes ‘t offisjieel gedeilte.

Ceremoniemeister
De Ceremoniemeister zorg d’r veur det de Boerebroelig van begin toet inj in gooi bane waert geleid en det jidderein dae ‘t Broedspaar wilt felicitere daotoe inne gelaegenheid waert gesjtèld. Vanaaf ‘t begin waerde ein en anger met verve gedaon door Piet Zeegers. Dae is echter begin 2015 met pensioen gegange en hae haet plechtig zien take euvergedrage aan Job Derix. Aan Job höbbe vier eine gooie, en dae zal zeer zeker met väöl enthousiasme de rol van Piet euvernumme.

nao baove